பிள்ளைப் பிராயத்திலே - அவள்
    பெண்மையைக் கண்டு மயங்கி விடடேனங்கு
பள்ளிப் படிப்பினிலே - மதி
    பற்றிட வில்லை யெனிலுந் தனிப்பட
வெள்ளை மலரணைமேல் - அவள்
    வீணையுங் கையும் விரிந்த முகமலர்
விள்ளும் பொருளமுதும் - கண்டென்
    வெள்ளை மனது பறிகொடுத் தேன், அம்மா!
 
ஆடிவரு கையிலே - அவள்
    அங்கொரு வீதி முனையில் நிற்பாள்; கையில்
ஏடு தரித்திருப்பாள் - அதில்
    இங்கித மாகப் பதம்படிப் பாள், அதை
நாடி யருகணைந்தால் - பல
    ஞானங்கள் சொல்லி இனிமை செய்வாள்; "இன்று
கூடி மகிழ்வ" மென்றால் விழிக்
    கோணத்தி லேநகை காட்டிச்செல் வாள், அம்மா!
 
ஆற்றம் கரைதனிலே - தனி
    யானதோர் மண்டப மீதினிலே, தென்றற்
காற்றை நுதர்ந்திருந்தேன் - அங்கு
    கன்னிக் கவிதை கொணர்ந்து தந்தாள்; அதை
ஏற்று மனமகிழ்ந்தே - "அடி
    என்னே டிணங்கி மணம்புரி வாய்" என்று
போற்றிய போதினிலே - இளம்
    புன்னகை பூத்து மறைந்துவிட்டாள், அம்மா!

சித்தந் தளர்ந்ததுண்டோ? - கலைத்
    தேவியின் மீது விருப்பம் வளர்ந்தொரு
பித்து பிடித்ததுபோல் - பகற்
    பேச்சும் இரவிற் கனவும் அவளிடை
வைத்த நினைவை யல்லால் - பிற
    வாஞ்சை யுண்டோ? - வய தங்ஙன மேயிறு
பத்திரண் டாமளவும் - வெள்ளைப்
    பண்மகள் காதலைப் பற்றிநிற் றேன், அம்மா!