ஞானப் பாடல்கள்
2. ஐய பேரிகை

ஐய பேரிகை கொட்டடா!-கொட்டடா
ஐய பேரிகை கொட்டடா!


1.  பயமெனும் பேய்தனை யடித்தோம்-பொய்ம்மைப்
        பாம்பைப் பிளந்துயிரைக் குடித்தோம்;
    வியனுல கனைத்தையும் அமுதென நுகரும்
        வேத வாழ்வினைக் கைப் பிடித்தோம்
                                            (ஐயபேரிகை)
2.  இரவியினொளியிடைக் குளித்தோம்-ஒளி
        இன்னமு தினையுண்டு களித்தோம்;
    கரவினில் வந்துயிர்க் குலத்தினை யழிக்கும்
        காலன் நடுநடுங்க விழித்தோம்.
                                            (ஐயபேரிகை)
3.  காக்கை குருவி எங்கள் ஜாதி-நீள்
        கடலும் மலையும் எங்கள் கூட்டம்;
    நோக்குந் திசையெலாம் நாமன்றி வேறில்லை;
        நோக்க நோக்கக் களியாட்டம்.
                                            (ஐயபேரிகை)