ஆயிரந் தெய்வங்கள் உண்டென்று தேடி
    அலையும் அறிவிலிகாள் ! - பல்
லாயிரம் வேதம் அறிவொன்றே தெய்வமுண்
    டாமெனல் கேளீரோ ?
                                             1
மாடனைக் காடனை வேடனைப் போற்றி
    மயங்கும் மதியிலிகாள் ! - எத
னூடும்நின் றோங்கும் அறிவென்றே தெய்வமென்
    றோதி யறியிரோ ?
                                             2
சுத்த அறிவே சிவமென்று கூறுஞ்
    சுருதிகள் கேளீரோ ? - பல
பித்த மதங்களி லேதடு மாறிப்
    பெருமை யழிவீரோ ?
                                             3
வேடம்பல் கோடியொர் உண்மைக் குளவென்று
    வேதம் புகன்றிடுமே - ஆங்கோர்
வேடத்தை நீருண்மை யென்றுகொள் வீரென்றவ்
    வேத மறியாதே.
                                             4
நாமம்பல் கோடியொர் உண்மைக் குளவென்று
    நான்மறை கூறிடுமே - ஆங்கோர்
நாமத்தை நீருண்மை யென்று கொள் வீரென்றந்
    நான்மறை கண்டிலதே.
                                             5
போந்த நிலைகள் பலவும் பராசக்தி
    பூணு நிலையாமே - உப
சாந்த நிலையே வேதாந்த நிலையென்று
    சான்றவர் கண்டனரே.
                                             6
கவலை துறந்திங்கு வாழ்வது வீடென்று
    காட்டும் மறைகளெலாம் - நீவிர்
அவலை நினைந்துமி மெல்லுதல் போலிங்கு
    அவங்கள் புரிவீரோ ?
                                             7
உள்ள தனைத்திலும் உள்ளொளி யாகி
    ஒளிர்ந்திடும் ஆன்மாவே - இங்கு,
கொள்ளற் கரிய பிரமமென் றேமறை
    கூவுதல் கேளீரோ ?
                                             8
மெள்ளப் பலதெய்வம் கூட்டி வளர்த்து
    வெறுங் கதைகள் சேர்த்துப் - பல
கள்ள மதங்கள் பரப்புதற் கோர்மறை
    காட்டவும் வல்லீரோ ?
                                             9
ஒன்று பிரம முளதுண்மை யஃதுன்
    உணர்வெனும் வேதமெலாம் - என்றும்
ஒன்ரு பிரம முள துண்மை யஃதுன்
    உணர்வெனக் கொள்வாயே.
                                             10